عديت عشرين سنة من عمري ساكت.
نشوف في العوج وما أمكنليش نعبر... وحتى كي ننطق كلامي فيسع ما تطفيه الرياح وتهزو لعالم النسيان...
ما عرفتش شنوة الحل...
قلت لعل هذاكا مكتوب ربي وتكون البكشة مرض وراثي نتناقلوا فيه أب عن جد...
وفي لحظة تغيرت كل أفكاري وكان دخولي في عالم التدوين بمثابة الوحي إلي هبط عليا وأعطى معنى للوجود...
الريح ما عادش يقدر يفسخ كلامي حيث حروفي محفورة على صخرة يقراها القاري والجاهل اليوم وغدوة وعمرها ما تتنسى!
تبعت دين حرية التدوين كيما ملاين في الدنيا، كلمة الحق جمعتنا، الجناس والطباق والإستعارة سبل التضرع في دعائنا لعالم أفضل...
الكتيبة فن الفنون
كي نشد قلم يسجد العالم ويقول لبيك يا فرعون
بمجرد حروف نحدث زلزال
وينزل من السماء ماء زلال
اخترت سبيل التدوين الحر
وما تسكتنا كان الموت
وحتى كان سقطنا
يتكلم عنا التابوت
ليت الجميع يلبي النداء
وفي 4 نوفمبر نغني سواء:
"دام التدوين الحر ودمتم طيبين"
Aucun commentaire:
Enregistrer un commentaire