البطولة الوطنية لخطف أرواح الشبان بإستعمال كرة القدم بتونس

بطولة العام هذا وصلنا لأرقام قياسية متاع وفيات ناتجة بطريقة مباشرة أو غير مباشرة لكرة القدم، هاو مرة واحد ضربو ميترو وهو ماشي للدربي، وهاو واحد عمل "كريز كاردياك" اثر هدف تعديل الترجي في آخر لحظة أمام الهمهاما ماغير ما نحكيو على إلي ضربوه جماهير الفريق المنافس وغيرهم وغيرهم...
قريب باش يتلزوا يعملوا بجنب الأرقام متاع المخالفات والتسلل وعدد التصويبات نحو المرمى، عدد الضحايا، المجاريح
منهم والذين وافاهم الأجل المحتوم...

وهذا آرتيكل قديم كتبتو في الموضوع

شنية الحكاية زعمة ؟
توا بطولة عندنا باش واحد يفديها بروحو ؟
الحقيقة، ساهل برشة واحد ينقد ويذم أما أنا بيدي من الناس إلي كي يمشيو للستاد نستريسي جمعة كاملة قبل الماتش، وأثناء المقابلة نتحول لعبد مغاير تماماً...
ما يوصلش بيا الأمر للضرب، ولكن نغني بدون إنقطاع، نصيح ونشجع.. وكان تجي تقيسلي الضغط متاع الدم لاما تلقاه في السماء...
هذا مع العلم إلي فريقي لا يلعب على كأس ولا على بطولة...
في بلادنا وفي العالم الكل، كرة القدم تعدات مرتبة الهواية باش تولي ديانة...
ما فيهاش ملائكة وإلاه ولكن فيها عزرائيل يقبض الأرواح متاع المشجعين.

ومانيش من الناس إلي مغرومين بالفرجة على هموم الناس، لكن هذه فيديو قام بتسجيلها موقع النادي الصفاقسي فيها والدين الشاب إلي عمرو 20 سنة إلي توفى أثناء المباراة الأخيرة لللنادي في كأس العرب. لعل تنفعنا الذكرى، ونكونوا من أولي الألباب ونعرفوا إلي الدنيا فيها موت...


قبل ما تبدى المباراة، الملاعبية تقوم بالحركات الاحمائية... نهار كيما النهارات الكل.
أما فما فرخ صغير عمرو ما يعديش العشرين، يعلق في أعلام بين فضى وهواء. كل شيء يهون على جال الجمعية. انشالله بركة لولاد ينورونا...
ريح تهب أكثر من اللازم، في وقت قاتل، في وضع قاتل... في زمان قاتل.

يطيح صاحبنا... ينقل إلى المستشفى في حالة خطيرة... بعد مدة، يتوفى...
هذي حكاية حزينة بين آلاف الحكايات... نردوا بالنا على سلامة وليداتنا في المستقبل...

ربي يصبر أهالي إلي فقدناهم، ويرحمهم الكل...