صحيح كبرنا أما نعنبو إلي يفسدها... هيّـا بنا نلعَـب

بعد الإستدعاء من اللص رقم واحد.

* خمس هدايا نتمنّى يهديوهالي

1- playstation3
2- تاليفون بورتابل بالويفي باش نبدى نفيس على العباد كيما الزبراط :)
3- ورقة بروموسبور نربح بيها خمسة مئة مليون وخمسة مئة وخمسة وخمسين مليم...
4- باسبور ديبلوماتيك.
5- بطولة تهديهالي الهمهاما.

* خمس عباد ماذا بيّ نضربهم

1- كريم حقي (مدافع تونسي ياسر ضاربو في روحو)
2- مادام يمينة (معلمة قراتني في السنة الرابعة حمراء، كانت حاكمة عليا بعقوبة أسبوعية... وكي نجيبهالها تقطعها وتلوحها قدامي)
3- كل إنسان يمشي في بالو إلي كي يعمل ركعتين يولي عندو الحق يدخل ويخرج لجهنم بدون فيزا ولا مرور عبر الديوانة.
4- واحد بعتلو بورتابل في عام السادسة ثانوي متاعي، قلبني في ثمانين دينار مشى يعيش في الخليج وإلى حد الآن ما رجعش لتونس (وهاني نستنى فيه)
5- واحد متعدي في الثنية لا في بالو لا في درايتو نفش فيه غيضي، وفي الآخر نقلو سامحني، راني غلطت فيك..

*خمسة إجراءات نتّخذها كان جيت رئيس

1- نخصص جراية بعشرة آلاف دولار لكل مدون تونسي.
2- نخرج عمار للتقاعد.
3- نولي نخطب بالعامية باش الناس الكل تفهمني.
4- نبني نفق سري يوليو يحرقوا منو الشباب في كل "الأمن والأمان"
5- أقيم بإنشاء ديوان المظالم، ويكون بإمكان أي تونسي أن يتوجهلي برسالة يشكيلي من أي عبد هضملو حقو.

*خمسة أشخاص نحبّ نعيش معاهم

1- العائلة الموسعة.
2- بنت الناس (أو مكبوبة السعد)
3- سمير لوصيف
4- شارل آزنافور
5- جاك برال

* خمسة حاجات نعملهم كان نعرف روحي نموت غدوة

1- نتوضى، نصلي ركعتين ونحكي مع ربي.
2- نطلع لقمة جبل بوقرنين، ونقعد نغني على طول صوتي.
3- نصفي برشة حسابات ما يلزمش نمشي ويقعدوا معلقين.
4- نهز فلوسي الكل ونعطيهم لكلوشار مطيش في الشارع. باش هكاكة نهار الفرق متاعي، حتى طحا... ما يسألهم: شنوة خلى خليل ؟
5- نكتب وصية نفرغ فيها قلبي، باش ما نمشيش وقلبي معبي على حتى حد وإنجم نرقد متهني.

نستدعى بدوري كل من:
1- بينك بانتر.
2- الزبراط
3- بنت عايلة
4- متاليستيك
5- الدوعاجي