إعلان حرب على جميع الشلايك

في تونس، جرب أعمل مشروع وإلا إكتب حاجة مفيدة وإلا حاول تحسن الوضعية.
أول ما يجيك، هوما الشلايك.
برشة ناس تتساءل، شكون الشلايك ؟ وشنوا الهدف متاعهم في الحياة؟
الشلايك يا سيدي كائنات حيةكيفي وكيفك ولكن قاتلها القلق وعندها الكابلووات متاع المخ يمسوا في بعضهم وهذا ما يخليهم يبحثوا ديما على نشر الفساد في الأرض وقطع دابر كل مظهر من مظاهر الإصلاح. هذا بقطع النظر
عن إنتماءاتها الإجتماعية أو الجهوية.
من واجب كل تونسي إلي يؤمن بالوطنية أن يحارب هؤلاء النبارة بكل ما أوتي من قوة.
توا ما عنديش برشة طحت بمشطرة في المدونة متاعي يبعث في التعليقات تحت إسم "مجهول" و مرة يسب و مرة يشتم في المعلقين وكأنو الهدف متاعو هو تعكير الجو في المدونة.
و كي قررت نقتلع هذه الكارثة من جذورها ونقوم بصنصرة موجهة لتعليقاتو مشى يجري لمدونات أخرى يسب ويشتم قالوا شنوة هذا مس من حرية التعبير.
الله مصلي على النبي!
ياخي قالق ؟
يا خويا هاو في بالك هذا القانون هنا.
الإحترام ثم الإحترام ولا غير الإحترام.
وإذا كان عندك ما تقول بدون المس من عرض الغير، مرحبا بيك في كل وقت.
وراني خوك "ولد باب السويقة والعوج ما نطيقه" فما بالك العوج إلي يمس مدونتي بالذات.
أيا برا يا مجهول بدل ساعة بساعة أخرى وساعد روحك في الدروج راهم ياما غدروا عباد.